Kunjut – kunjutdoshlar oilasiga mansub moyli ekin.
Vatani – Afrika. Poyasi tik o‘sadi, 4-6 ta uzun yon shoxlar chiqaradi. Bargi oddiy, bandli, yakka-yakka yoki qarama-qarshi joylashgan, tukli. Mevasi ko‘sakcha, cho‘ziq, yassi, tukli. Bir tupda 20-300 ko‘sakcha bo‘ladi. Ko‘sakchasi 2 yoki 4 chanoqli.
Uzunligi 3-5 sm. 1000 dona urug‘i vazni 2-5 gr. Urug‘ining rangi och yoki to‘q jigarrang, goh oq va qora. Kunjut issiqsevar, yorug‘sevar, qisqa kun o‘simligi. Urug‘i 15-16°С da unib chiqadi. O‘sish davri 90 – 110 (120-150) kun.
Kunjutdan qimmatbaho, shifobaxsh moy olinadi. Urug‘i tarkibida 65% moy, 16-19% oqsil, 16-17% azotsiz moddalar mavjud. O‘suv davrida 2-3 marta kultivatsiya qilinadi, ikki marta har gektarga 40-50 kg dan azotli o’g’it berib qo‘shimcha oziqlantiriladi. Gullashiga qadar 1-2 marta, gullash davrida 2 marta suv beriladi.
Qishloq xo’jaligida bilim va innovatsiyalar milliy markazi tizimidagi O’simliklar genetik resurslari ilmiy-tadqiqot instituti tomonidan kunjutning «Sadaf», «Qora shahzoda» va «Toshkent 22» navlari yaratilib, davlat reystriga kiritilgan.
Bugungi kunda yurtimizda yetishtirilayotgan kunjut mahsuloti Ozarbayjon, Belarus Respublikasi, Germaniya, Qozog‘iston, Qirg‘iziston, Livan, Mongoliya va Tojikistonga eksport qilinmoqda.
